مامۆستایەکێ زانکۆیا زاخۆ پشکداری د سێیەمین کۆربەندێ پەروەردەیی یێ کوردستانێ دا کر

Published Date: Wednesday, 27 August 2025, 22:31

ڕێــککــــەفتی ٢١ و ٢٢ی ئابا ٢٠٢٥، بەرێز (پ.هـ.د. مسعود محمد حسن)، مامۆستایێ پشکا کۆمپیوتەرێ ل کۆلیژا زانست ل زانکۆیا زاخۆ، پشکداری د سێیەمین کۆربەندێ پەروەردەیی یێ کوردستانێ دا کر. ئەڤ کۆربەندە ب ناڤونیشانێ “فێربوونا دیجیتاڵی و ژیرییا دەستکرد د پەروەردێ دا” (Digital Learning and Artificial Intelligence in Education) ژ لایێ وەزارەتا پەروەردەیا حکومەتا هەرێما کوردستانێ ڤە و ب سپۆنسەرییا “MEDIA AVA” هاتبوو ڕێکخستن.

مامۆستایێ هێژا پشکدارییەکا چالاک و بەرچاڤ د کۆربەندی دا هەبوو، چ د پەنێل، دیبەیت، گفتوگۆ یان د چەندین بەرنامەیێن تەلەڤزیۆنی یێن ڕاستەوخۆ دا بیت.

گرنگییا پشکدارییا ڕێزدار دکتۆر مسعودی د ئەوێ چەندێ دابوو، کۆ ئەو و قوتابیێن وی یێن دکتۆرایێ د ناڤا هەول و بزاڤێن دامەزراندنا ئێکەم مۆدێلێ کوردی یێ ژیرییا دەستکرد دانە. ئەڤە پرۆژەیەکێ پێشەنگە ل سەر ئاستێ جیهانێ، چونکی هەتا نوکە مۆدێلەکێ ب ڤی ڕەنگی کو ب تایبەتی لسەر بنەمایێن مێژوو، ناسنامە و کەلتورێ کوردی هاتبیتە ئاڤاکرن و ب تەمامی ب زمانێ کوردی کار بکەت، نینە.

لایەنێن بەرپرس و ڕێکخەرێن کۆربەندی گرنگییەکا تایبەت دا ب هەولێن مامۆستایێ ناڤهاتی و پشتەڤانییا خۆ بۆ پرۆژەی دیار کر. هەروەسا، ڕەزامەندییا خۆ نیشان دا بۆ پتر هەماهەنگی و پەیوەندییان لگەل زانکۆیا زاخۆ د ڤی بوارێ زانستی یێ گرنگ دا.